திருவனந்தபுரம்:
சபரிமலையில் இளம்பெண்கள் சாமி தரிசனம் செய்ய எதிர்ப்பு தெரிவித்து அய்யப்ப பக்தர்கள் போராட்டம் நடத்தி வருகிறார்கள். தற்போது சபரிமலையில் மண்டல பூஜைக்கால வழிபாடுகள் நடந்து வருகிறது.
வழக்கமாக மண்டல பூஜை காலத்தில் சபரிமலையில் அய்யப்ப பக்தர்கள் கூட்டம் அலைமோதும். சபரிமலையில் நடைபெறும் போராட்டம், பக்தர்களிடம் போலீஸ் கெடுபிடி காரணமாக தற்போது அங்கு வருகைதரும் பக்தர்கள் கூட்டம் குறைந்துள்ளது.
இதன் காரணமாக சபரிமலை கோவிலுக்கு காணிக்கை, பிரசாதம் விற்பனை போன்றவை மூலம் கிடைக்கும் வருமானமும் குறைந்துவிட்டது.
சபரிமலையில் அய்யப்ப பக்தர்களுடன் சேர்ந்து பாரதிய ஜனதா, ஆர்.எஸ்.எஸ். மற்றும் இந்து அமைப்பினரும் போராட்டம் நடத்துவதால் இன்று வரை சபரிமலையில் இளம்பெண்கள் தரிசனம் செய்ய முடியவில்லை. மாநில அரசு சபரிமலையில் போலீசை குவித்து பாதுகாப்பை பலப்படுத்திய போதும் சுப்ரீம் கோர்ட்டு உத்தரவை அமல்படுத்த முடியாத நிலையே உள்ளது.
இந்த நிலையில் பாரதிய ஜனதா கட்சி தனது போராட்டக்களத்தை சபரிமலையில் இருந்து திருவனந்தபுரத்திற்கு மாற்ற முடிவு செய்துள்ளது. திருவனந்தபுரத்தில் உள்ள கேரள அரசு தலைமை செயலகம் முன்பு போராட்டம் நடத்தி அரசின் கவனத்தை ஈர்க்க அவர்கள் முடிவு செய்து உள்ளனர்.
அதன்படி வருகிற 3-ந்தேதி காலை இந்த உண்ணாவிரத போராட்டம் பாரதிய ஜனதா கட்சியின் மாநில பொதுச் செயலாளர் ராதாகிருஷ்ணன் தலைமையில் தொடங்குகிறது. முதல் கட்டமாக 15 நாட்கள் இந்த உண்ணாவிரத போராட்டம் நடைபெறும் என்றும், ஒவ்வொரு நாளும் ஒரு மாவட்டத்தை சேர்ந்த பாரதிய ஜனதா தொண்டர்கள் பங்கேற்பார்கள் என்றும் அறிவிக்கப்பட்டு உள்ளது.
சபரிமலையில் பக்தர்களிடம் போலீஸ் கெடுபிடியை கைவிட வேண்டும், 144 தடையை நீக்க வேண்டும், சபரிமலை சென்ற மத்திய மந்திரி பொன்.ராதாகிருஷ்ணன் உள்பட பக்தர்களிடம் போலீசார் அவமரியாதையாக நடந்து கொண்டதை கண்டித்தும், பாரதிய ஜனதா பொதுச் செயலாளர் சுரேந்திரன் உள்பட கட்சியினர் மீது போலீசார் போட்டுள்ள வழக்குகளை வாபஸ் பெற வேண்டும் போன்ற கோரிக்கைகளை வலியுறுத்தி இந்த போராட்டம் அறிவிக்கப்பட்டுள்ளது.
மேலும் சபரிமலையில் இளம்பெண்களை சாமி தரிசனத்திற்கு அனுமதிக்க எதிர்ப்பு தெரிவித்தும், சபரிமலையை பாதுகாக்க கோரியும் மாநிலம் முழுவதும் 1 கோடி பேரிடம் கையெழுத்து பெறவும் இயக்கம் நடத்த பாரதிய ஜனதா திட்டமிட்டு உள்ளது.
மாநிலம் முழுவதும் ஒவ்வொரு பஞ்சாயத்திலும் சபரிமலை பிரச்சனைக்காக பாரதிய ஜனதா போராட்டம் நடத்தும் என்று அறிவிக்கப்பட்டுள்ளது. இதுதொடர்பாக பாரதிய ஜனதா மாநில தலைவர் ஸ்ரீதரன்பிள்ளை கூறும்போது சபரிமலையில் நடைபெறும் போராட்டத்தை அய்யப்ப பக்தர்கள்தான் நடத்துகிறார்கள். அவர்களுக்கு உறுதுணையாக பாரதிய ஜனதா பின்னணியில்தான் செயல்பட்டு வருகிறது. இனிதான் எங்களது போராட்டம் எப்படி இருக்கும் என்பதை மாநில அரசு பார்க்கப்போகிறது என்றார். #Sabarimala #BJP
